|
|
|
الجمعة , 24 كانون الثاني/يناير 2025
المنطقة ملتهبة
بقلم : احمد حسن الزعبي 05-05-2014 12:26 AM فتح باب «السيكوريت» الزجاجي ودخل ..أجواء هادئة ، وصالة الانتظار في مجملها مليئة بالنساء وبعض الشباب اليافعين...رفع يده مسلّما ووقف أمام المكتب البارز في المقدمة ، سألته السكرتيرة..»أول مرة»؟؟..فشرع يصف حالته الصحية..»لا والله يختي..مش أول مرة..صابتني واني ابن ستطعش يا سبعطش وقعدت بيجي شهرين»...فصححت له السكرتيرة: لا حجي أنا قصدت أول مرة بتراجع عند الدكتور..فهزّ أبو يحيى رأسه مشيراً إلى أنها أول مرة.. تناولت السكرتيرة بطاقة زرقاء وبدأت بكتابة التاريخ واليوم..ثم سألته: *- الاسم..؟؟ * أبو يحيى! * السكرتيرة: اسمك الكامل حجّي!. * ابو يحيى: راضي عايش سالم الــ»أبو يحيى» * السكرتيرة: العمر؟ * أبو يحيى : 72 * السكرتيرة: عشرين! * أبو يحيى: الله يجبر بخاطرك..يعني مبين عليّ ابن عشرين؟! *السكرتيرة: بقلك هات عشرين ليرة كشفية.. أخرج كيسا بلاستيكيا شفافا من جيب ثوبه الأيمن انتزع عشرين ديناراً عتيقة وناولها..ثم جلس بين المراجعين، نادت السكرتيرة على «فاتن» فدخلت شابة مع والدتها..قالت سيدة أخرى لابنها ذكرني نجيب «مطاط» لــ»عصّوم»..كل بيجاماته «بيسحلن»..في الكرسي المقابل كان شاب يعبث بـ»نغزة» في جبهته..فنهاه صديقه..»تلعبش فيها» بتروح لحالها..وعلى كرسي منفرد ، تجلس فتاة تتحجج في فتح دفاترها الجامعية كي لا يشتبك نظرها مع نظر المراجعين..دخلت ام «عصّوم» الى الطبيب ..ثم بعد ربع ساعة دخل الشاب «أبو نغزة»..ثم طلبت الفتاة الوحيدة من السكرتيرة تأجيل دخولها لحين وصول والدها...»حج راضي عايش « تفضّل قالت السكرتيرة... دخل أبو يحيى الى عيادة الطبيب بأكياس خضرواته ، سلم عليه ، ثم جلس .. • الطبيب: سلامتك حجّي! • أبو يحيى: الله يسلمك.. • الطبيب: من شو بتشكي.. • ابو يحيى : والله يا دكتور أني مش مثل أول ..حاس حالي منتزع ومزاجي خام..لا بعرف أقعد ولا بعرف أنام ..ولا أوكل...يا رجل معقول ...صارلها سنتين والمنطقة ملتهبة... • الطبيب : طيب!!. • أبو يحيى: رغم الألم اللي فيه من جوه...أني زلمة بحب السياسة...يعني كل ليلة بتبطّح ع جنبي وبحطّ ع الجزيرة والعربية بقول «بلكي الله حفّت شوي» ..فيش دقيقتين نار وبتشب فيه.. بعرف انه المنطقة ملتهبة..بتبطّح ع بطني وبدير الراديو ع لندن... كمان نفس الاشي المنطقة ملتهبة...بصير أقزدر وافكر شو بده يخففها طيب أني كإنسان عادي شو ممكن أسوي.. بدك الصحيح..صاير كل ما أحس انه المنطقة بعدها ملتهبة أعصّب وانرفز أكثر وببطل الي نفس أحكي مع حدا... • الطبيب: حجّي..أنا طبيب جلدية..انت بدك محلل سياسي..يا طبيب نفسي يشوف مشكلتك ..لأنه الدول الكبرى والأمم المتّحدة مش قادرة تسوي أشي بالمنطقة الملتهبة... (الراي)
التعليقات
1) تعليق بواسطة :
05-05-2014 04:53 PM
 كل هذا لتقول منطقه ملتهبه ؟!
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق