|
|
|
السبت , 23 تشرين الثاني/نوفمبر 2024
الفيفا اطلابة مش طابه
بقلم : طه عبدالوالي الشوابكه 01-11-2015 11:26 AM الى الاهل عرب الخليج الفيفا اطلابة مش طابه بالبلدي الاردني الخالص بنقول لكل العرب من الخليج الطيب للمغرب العربي الحنون مرورا بالحبيبة الموجوعة فلسطين وما حولها انو الموضوع مش موضوع طابه يا جماعة, الموضوع غابة واطلابه (حاجة), الغابة فيها الصديق والعدو فيها الاليف وفيها الوحش, والطلابة يعني الحاجة هي الوحدة اللي اشتهيناها من الف سنة, ليش العرب المحترمين الطيبين بخربوا على بعض؟ ترى مثل ما قال سمو اميرنا المحبوب بكلامه الموزون انو أي عربي بترشح احنا معاه قلب وقالب واللي بخدم ناسه وعربه كويس رح يسعدنا وجوده على كرسي الفيفا. شو بدنا احلى واجمل من هيك كلام من امير ابن ملوك ضحوا بارواحهم وامجادهم نذروها علشان هالامة يكون الها كيان محترم, وانا لما بحكي هيك يا جماعة ما جبت اشي جديد والله, الكل منكو عارف بس انا بذكر اللي ناسي, كمان انا لما بحكي هيك ما بزاود على حدا ترى كل العرب طيبين وشهمين والهم تاريخهم اللي بنفخر فيه من عرب الخليج لعرب المغرب الكبير لبلاد الشام ومصر ام العروبة. عتبي على كل العرب اهل المروءة والشرف لانهم مقصرين بحق بعضهم من زمان وبالذات هاي الايام (الاقصى واللي بيصير فيه من اهل الخنزرة والسعادين, وسوريا والعراق وليبيا الله يفرجها ويعين). أنا بتساءل وبقول ليش ما بقعدوا كل العرب اعضاء الفيفا مع اللي حابين يترشحوا منا ويتفقوا بينهم على واحد والكل يصوت معه, احنا اذا عملنا هيك ترانا بنخوف كل عدو بحاول يفترسنا متفرقين, وهاي اول خطوة جريئة بنوخذها باتجاه الوحدة العربية واقوى رسالة فصيحة بنوجهها للي حكموا على وحدتنا بالموت والعدم وقالوا عنا عرب ما فيهم فايدة (منفعة). بجوز كلامي بدو شاهد عليه, وشاهدي ياجماعة هو نفسه كلام (المرشح) الامير علي ابن الملك حسين ابن الملك طلال ابن الملك عبدالله الاول..... الرسول (صلى الله عليه وسلم), هذول اللي قضو وفنوا اعمارهم مشان حلم هالامة يتحقق وكلمتها تتوحد على ارض وحده مش على طابة جلد بتنطنط ما الها وجه من قفا ولا الها راس من اساس. كلام الامير حتى يوم ما خذلوه بعض اخوانا العرب اول مرة (الله يسامحمهم) كان موزون واليوم وبكره صدقوني رح يظل موزون لانه كلام مبني على مبدأ اتربى عليه مش كلام قاله عالماشي في الهوا للاستهلاك. انا واثق انو كل العرب محترمين والخلايجة اهلنا وعزوتنا واحنا الاردنيين ترانا عزوة صح يعني رجال قول وفعل وبنرفع الراس يومن الخيل تتخربط وتحتاس (لن نشفت الريق), طيب ليش هالبغضة اللي ما الها أي اساس؟ خلينا نجمع شملنا لو على طابة جلد اضعف الايمان علشان لما ندخل هالغابة نكون ايد وحده ونضرب اروع مثل في الوحده ما قدرت تحققه المؤتمرات ولا الطاولات ولا كل المليارات والهتافات. انا بدي احكي بخصوص اخوانا وعلى راسهم شيوخنا في الخليج الكريمين الطيبين اللي برجولتهم وفراستهم حموا الامة من كثير من المصايب من الملك فيصل بن عبدالعزيز الله يرحمه للصباح لآل نهيان وآل خليفة وآل ثاني وابن سعيد الله يرحم اللي توفى منهم والطيب ليت عمره مديد وعرشه شديد, ترى الشيخ (يا وجوه الخير) ما صار شيخ الا لانو بفهمها وهي طايرة وبجبرها قبل ما تنكسر مش بقعد يطبب فيها وهي مكسرة وملتعن ابوها ولا فيها شقفة بتركب على اختها, ترى الشيخ كل اشي محسوب عليه وتصرفه في أي موضوع هو قانون ومبدأ لكل الناس رح الكل بعدها يمشي عليه ويقول ( ترى انا ما دخلني مهو الشيخ فلان قبلي قال هيك وعمل هيك, اعذروني يا جماعة ترى انا مش افهم منو), يعني كل حركة بعملها (نبراس وقدوة لكل الناس). اهلنا في الخليج الله يسعد مساكو واذا الدنيا صباح يسعد صباحكو, ترى احنا الاردنيين ومعانا كل العرب الشرفاء بنقول وبندرس عيالنا في المدارس انكو انتو دايما طلابين (دعاة) وحدة عروبة واسلام, عشان هيك املنا رح يظل فيكو كبير بارك الله فيكو وفي فزعتكو يا عيال عمنا المحترمين, خلينا مرة وحده بس (نعمل نهفة) ونخوف كل اللي بعادينا مشان يعملونا حساب (والعيدان اذا تفرقت كل واحد منها لحاله يا مسهل كسرها بس لما بتتجمع وبتنرص على بعضها أكيد بتصير صعبة الكسر), خلينا نتفق يا جماعة وبلاش القال والقيل والطعن في بعضنا والتجريح, ترى اللي بعيبك بعيبني واللي بشرفك والله بشرفني لاني منك وانت مني ( واللي منك ما بخلا من همك) والله الشاهد والكفيل. مرة ثانية يا عرب يا طيبين الموضوع مش موضوع طابة الموضوع اطلابة, خلينا نفهمها وندبرها بلكي الوحدة بتصير, احسن لا يطير الطير وتروح الفرصة ويشمت فينا الغير, (صبحكم | مساكم) الله بالخير.
التعليقات
1) تعليق بواسطة :
20-11-2015 07:04 AM
 والله كفيت ووفيت يا أستاذ طه الشوابكة الله محيي أصلك! كلامك كله زين وع العين والراس. هذا هو الكلام السديدالصحيح في موضوع الفيفا وترشيح عربي لرئاستها. إحنا كأردنيين هاشميين مفروض وواجب علينا ندعم أميرنا الشهم علي وكعرب واجبنا تدعم أي مسؤول عربي نتوسم فيه الخير ليمثلنا نحن جميعاً أمة العرب سواء كان من اخواننا "الخلايجة" اللي فيهم دايماً الخير، أو من أي بلد عربي آخر. فنحن أمة واحدة موحدة يجمعنا أصل واحد وتاريخ واحد وأرض واحدة من المحيط الى الخليج. هكذا يجب أن نكون دايماً "متوحدين" ع الخير والشر!!!
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق