حياة شهيد ..

السبت , 23 تشرين الثاني/نوفمبر 2024

حياة شهيد ..

بقلم : حمزة السحيمات
05-12-2015 12:54 PM
يابوي بدي اسجل بالأمن العام ..
التسجيل في المحافظة يوم الاربعاء ..
فحصت طبي وأموري تمام ..
ألـو .. يا قرابة بدنا نسجل هالعيل بالامن ، بدنا دعمك ... أبشر
يا أبو فلان .. مبروك أبنك قبلوه .... ولو بعيونا بنخدمك
دورة سنة ..الله بعينا عليها .. حلقنا ع الصفر .. وبكره السفر
40 يوم .. تراب وعفار ومي مثلجه وحلاقة كل يوم ونوم العشاء وصحوة الفجر ..
انضباط ..أمرك سيدي .. حاضر سيدي .. المشيه ميه ميه .. قرب التخريج
زغاريد وفرح ومباركة ومناسف ...مبروووك
إجازة أسبوعين .. طلع التوزيع .. الالتحاق يوم الأحد
سنة ..سنتين .. خطبة وزواج .. إجازة أسبوع زيادة، حلوان من الآمر ..مبروك
أول ولد .. الثاني بنت .. صار لازم نسافر نجيب مصاري نسد هالديون ..
فيه تنسيبات .. 6 شهور لا سنة ..احتمال يمددوا
يا بيك عندي هالولد وبده يسافر بوحده من هالسفرات .. عنده عيله ووضعه على الحديده ....
يا أبو فلان ..مبروك أبنك رح يسافر .. ومو ستة شهور لا سنة
الله يكثر من أمثالك ..ويجزيك الخير
وداع ..وغربة ..وام الأولاد وامي وابوي ..بعين الله
شفت الموت .. متى رح أرجع .. يا الله الصبر
فتح غمض ..رجع الشب .. حامل ومحمل ..
المدام بدها تشتري وتبدل..والسيارة صارت على باب الدار ..والديون راحن ..أحمدك يارب .
الإجازة انتهت .. والدوام الأحد .. يا الله التساهيل
سنة بعد سنة .. من شارع لاشارع ومن مناوبة لامناوبة ..وبالصحراء وعلى الحدود ..ودوام 12 ب 12 .. والسهر هو الرفيق
مجرمين ..سراقين .. زعران .. مخالفين .. والهمة عال العال
.
.
.
بطريقهم ماشيين ..وبحفظ الله وأمانه .. وكأس القهوة بينه وبين زميله
وصوت جهاز العمليات عامر ، والرجال سهرانه
فجأة : صوت النار يدوي بالسيارة !!
يا الله يا ساتر .. آآآآآآآخ ..ياااابوي .. أتصاوب برصاص غادر
شريط حياته مر قدامه .. من يوم ما قال لأبوه بدي أسجل بالأمن
وولاده وزوجته وأمه وأبوه .. يارب أنهم بحفظك
انقلبت السيارة .. وظل نفس ..نفس الرجال
مسك الجهاز وبلغ العمليات عن المجرمين .. حتى أخر لحظاته .. ظل الأمن والشغل بدمه ..
لكن هالمرة مارح يتكرم على بلاغه عن المجرمين من مديره
تكريمه من رب العالمين .. كرمهُ بالشهادة
وهون انتهت الحكاية .
ربنا يرحم شهداء الأمن العام

التعليقات

لا يوجد تعليقات

تنويه

تتم مراجعة كافة التعليقات ،وتنشر في حال الموافقة عليها فقط. ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن علما ان التعليقات تعبر عن أصحابها فقط .

الاسم :
البريد الالكتروني :
	اظهار البريد الالكتروني
التعليق :	بقي لك 300 حرف