|
|
|
السبت , 23 تشرين الثاني/نوفمبر 2024
يوميات عقله
بقلم : خالد العلاونه 28-06-2016 03:13 PM يوميات عقله (عيد ميلاد) عقله متبطح على ظهره وحاط إجر على إجر ..وقدامه كاسة شاي وسارح بهالدنيا وبفكر ... والمره قاعده قباله ولا كأنها موجوده فجأه عقله بعدل قعدته وبلد بمرته لده غريبه إلها ميت معنى وبسألها عقله: هيييه يا مره ... شو بكره المره : شو بكره ... بكره الأربعا عقله : ولج قصدي شو بكره التاريخ المره : وأني شو بدريني .. أني باقي روزنامه عقله: ولج بكره عيد ميلادي المره : يا خايب يا نايب إنت من أميت إلك عيد ميلاد عقله : كل سنه مثل تاريخ بكره بكون عيد ميلادي يعني بزيد عمري سنه وهالسولافه من أكثر من ستين سنه المره : طيب وشو يعني ... مع إني خابر إنك قلتلي إنه إنت عملولك تقدير سن يعني هاظ مش عمرك الحقيقي عقله : المهم عيد ميلادي بكره ... يعني حضري حالك لحفله مطنطنه المره : شو حفله وشو مطنطنه يا زلمه بدك تفضحنا على تالي هالعمر عقله : شو افضحج وما افضحج .. يعني عيد الميلاد إشي خام المره : لا مش خام بس انت زلمه كبير والناس بتصير تضحك علينا عقله: يضحكو علينا لويش ... مبارح رئيس وزرا سابق عمل حفلة عيد ميلاد مطنطنه ومش هون ببلاد برى المره: وين ببلاد برى ... عقله : بقولو بأجمل منطقة بايلاطيا المره : يا زلمه أول مره بسمع بيها وين إيلاطيا هاي ... لا يروح أطاليا ... طيب مين بده يحضر حفلته هناك ... اله معارف بهذيك البلاد عقله : شو بعرفني .. وبقولو إنه حاجز طيارات خاصه تا تشيل شلته ومعارفه واصدقاه من هون لهناك ... وبجوز ماخذ معاه ذبايح كثير وبيبسي وكيك المره : يا زلمه منين جبت هالسوالف ... بدك تساوي عيد ميلاد ساوي لويش بتتبلى عالزلمه ... بعدين إفرض إنه صحيح شو دخلنا هو عاملها عحسابنا . عقله :صدقيني عاملها عحسابنا والأيام رايحه تثبت هالحكي .. لأنه واحد تعبان بالمصاري وعرقان فيها ما بعمل هيج عمايل .. هاي السوالف ما بسويها غير واحد كان مسؤول كبير وتحت ايده مصاري البلد .. وبركة ايده كانت اكثر من بركة هالبلد .. بس انا محيرني سؤال ومش ملاقي جوابه المره : خير عقله: يا ترى اللي كانو يعزموه عالقرى والدواوين والمضارب والمضافات .. ويذبحوله ويسحجوله .. ويرعشوله .. معزومين لهناك ولا طقعلهم المره : غير عزمهم ... معقول ما يردلهم عزايمهم عقله: والله ما ظنيت .. هظول الجماعه الكبار .. بعتبرو الزغار درجات سلم بطلعو عليها .. ولما بصل ظهر الحيط بدفش السلم بإجره ... ما علينا .. قومي .. قومي .. حضري لحفلة عيد ميلادي المره : شو بدي اخضر خالصه عقله : بدي احتفل بعيد ميلادي بالجزيره ... قصدي بالوعره اللي غربي القريه ... واوخذ معي قالب كيك ولتر بيبسي وشوية بزر .. بديش تبذير .. هاي مصاري تعبنا فيها ... مش لهطناها من مال البلد المره : ومين بدك تعزم عقله : اخوي محمد .. وجيرانا ابو صالح وابو تيسير المره : وشو بده يوصلهم للوعره ... مين بده يجيبهم عقله : كل واحد يرجب جحشه وييجي ... ولا بتفكري جدي رئيس وابوي رئيس المره : طيب وابو سليمان ما بدك تعزمه ... هظيك المره عزمك على طهور ابن ابنه عقله : ما عزمني محبه بي ... عزمني عشان الناقوط ...يعني مصلحه ... مثل اللي عزمو دولته للشهره .. واول مناسبه عنده حلقلهم كلهم ...لما يصير عندي مناسبه فيها ناقوط او إلي مصلحه عند ابو سليمان بعزمه ... هاظ عيد ميلاد برى القريه ولازم المعزومين يكونو من المقربين والمحسوبين ... وباقي الناس زتهم ورى ظهرك مرته: الله يثبت علينا العقل والدين .. الزلمه ضيَع
التعليقات
1) تعليق بواسطة :
28-06-2016 10:14 PM
 نعتذر
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق