|
|
|
السبت , 23 تشرين الثاني/نوفمبر 2024
يوميات عقله
بقلم : خالد العلاونه 31-07-2016 03:15 PM يوميات عقله (مقر انتخابي) بعد صلاة الجمعه .. عقله طالع من الجامع ..بهلل وبسبح ... وفجأه هجم عليه ابو صالح وين يا عقله .. ما بتبين عقله: جيف ما ببين .. مبارح صليت معاك المفرب ابو صالح: يا زلمه انا قصدي ما بتبين بهالميمعه عقله: اي ميمعه يا زلمه شو صاير ابو صالح: ما بنشوفك بالمقر عقله: اي مقر ... الامم المتحده ولا جامعة الدول العربيه ؟ يا زلمه بتفكرني ناصر جوده؟ ابو صالح : ايوه اعمل حالك غشيم .. يا زلمه مقر ابو عيسى .. المرشح عقله: هو ابو عيسى مترشح .. صدقني ما بدري ابو صالح: يا زلمه تعال خلي الناس تشوفك عقله: لويش خيوه الناس تشوفني .. مالني ..هاي الناس بتشوفني بالجامع .. بالسوق .. بالحاره .. واللي مشتاقلي بعرف باب داري ابو صالح: يا زلمه شوف عن شوف بفرق .. لما يشوفوك بالمقر بتأكدوا انك معهم وبتريحو عقله: مع مين يا زلمه هو احنا بحرب .. ابو صالح:مش حرب يا زلمه ... لما تغيب وما تيجي على المقر بتصير الناس تسولف وبصيروا يقولو عقله مش معنا وبدهوش يصوت لمرشحنا ... بعدين هاي كل القريه بتيجي عالمقر والناس بتشوف بعضها وبعدين ابو عيسى بشوفك وبطمن عقله: سلم على ابو عيسى وقله عقله بدعيلك ابو صالح.: يا زلمه تعال مثلك مثل هالناس عقله:اسمع يا ابو صالح ترى صحيح ما بتشوفني بالمقر.. بس ممكن تشوفني عند الصندوق . قوماك اللي بتشوفهم بالمقر ... بجوز ثلثينهم ما تشوفه عند الصندوق . . هاي انتخابات يا عمي والنفاق بولع فيها .. ابو صالح:يعني اقول لابو عيسى انك معه عقله: لوكت الانتخابات بفرجها الله .... عقله يترك ابو صالح وبمشي وهو يتمتم الله يعين هالمرشحين بالهالشهرين ..قال مقر انتخابي قال
التعليقات
لا يوجد تعليقات
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق