قرأت خبر عن اثرياء العالم .. وهواياتهم .. ومن ضمنهم ملياردير تقدر ثروته ب (20 مليار ) دولار , وسبب ثروته هو اختراعه وانتاجه لمجرد ( عصير ) له تركيبه معينه وهي بحد ذاتها بسيطه مش معقده واطلق عليها اسم ( ريد بول ) اكتسحت العالم بمجرد دعايه بسيطه , بمعنى انه من خلال هذا ( المشروب ) البسيط جنى ثروه تعادل ( 30 بئر نفط ) .

اخ بس اخ ... يا اخي الكريم ... مش عارف شو بدي احكي .. فعلا ( العرب ) ما الهم نصيب بأشي ... كل امة العرب ما خطر على بالها تعمل ( انتاج شغله معينه ) على سبيل المثال ( عصير/ مشروب ) يدر عليها دخل وثروه من لا شيء .. من مجرد عصير تافه لا بقدم ولا بأخر .
بس احنا شاطرين ( نكرع ) ( سوس وخروب وتمر هندي ) ونشكي الفقر والمديونيه ... مش عارف شو بميز هذا المشروب المسمى ( ريد بول ) عن باقي العصير .. بس لانو الزلمه شغل عقلو ومخو واوجد تركيبه معينه لهذا العصير والبسو صفه ان هذا العصير ( يمنح القوه والنشاط ) فحقق الو مبيعات خياليه حققت له ثروه خياليه.

بلاش ( ريد بول ) ...
واحد صغير بالعمر عمل ( موقع الكتروني ) مثل ( الفيسبوك بوك ) برضو صار ملياردير من ورا موقع الكتروني تافه غير مكلف ابدا .. هو عباره عن كودات مكتوبه غير مرئيه .. لا في مواد اوليه ولا شحن بضاعه ولا في صناعه تحويليه ولا ما يحزنون .. عباره عن برمجه لصفحات الكترونيه وهو قاعد على الكرسي .

احنا العرب عباره عن امه ( مستهلكه ) .. بنوخذ من الغير اختراعاتهم ومنتوجات الغير على الجاهز .. وبتبلش ندفع .. انك اتشغل عقلك .. مستحيل .. بس شاطرين نستهلك ونستغيب ونم ونشحن بطاقات وانعفط سجاير ... وعلى ابوك وعلى امك لما انتلت المحاكم قضايا مشاجرات .. ليش لانو احنا فاضين اشغال .. فش ورانا الا القال والقيل والمشاكل والتخويثات ... الامه العربيه ضيعت تراثها وحضارتها وعلومها وما صنعوه اجدادنا .. بدل ما انزيد على امجادنا .. قمنا حضراتنا شطبنا امجادنا وضيعناه وبدلناه بالتفاهات والحكي الفاضي .

يا اخي انا مش طالب منك تصنع صاروخ .. يا عمي انا بقولك شوفلك شغله بسيطه اتصير من وراها ملياردير مثل باقي خلق الله الاجانب والناس الغربيين ... ولك يا عمي شو بفرق عقلو عن عقلنا .. ولك يا عمي بكفي نياطه ... ولك قوم عن اخت هالفرشه ملزق فيها تلزيق اكلت من جلدك ... قوم اخلط ( خروب مع سوس مع قرفه مع كمون ) بركي على الله طلع معاك مشروب ولا عصير ولا اشي يجبلك ثروه مثل هذا الهبيله صاحب مشروب الطاقه ( ريد بول ) .. يا عمي اخلط جزر مع بطاطا مع خس مع مخلل مع جوز جرابات بركي طلع معاك اشي يتسوق بهالعالم ويحققلك ثروه .. يا عمي اخترعلك لمبه بتشتغل على الطاقه الشمسيه .. يا عمي اخترعلك كندره بتتنبأ بالزلازل والبراكين .. ولك يا عمي بدي بس واحد عربي يخترعلو اشي .. اي اشي يا عمي غير قصائد شعر ونثر ومقالات وكتابات ومناكفات سياسيه واقتصاديه وفتاوي لا الها اول ولا اخر..

يا اخي اعتق جارك لله وروح ( مكنكلك ) شغله بركي على الله طلع معاك اشي يرفعك فوق بدل ما الواحد فينا قاعد مسخوط .. يا اخي منشان الله اتحرر من عقده ( البير نفط ) .. بنشكي الفقر دايما لانو ما عنا ( نفط ) ..هو الثروه والغنى ما بتيجي الا من ورا ابيار النفط الجاهزه الي جل جلاله الله سبحانه وتعالى خلقها واوجدها بدون تدخل انسان ... ليكون العرب بفكرو الهم يد بابيار النفط تبعتهم .. لا يا عمي .. ابيار النفط اجتك جاهزه وحضرتك ( فحجت ) عليها ... بس حضرتك بتبيع .. مثل الدكنجي ... وعلى فكره .. الي عندو ابيار نفط ابدا مثلو مثل الي اخترع ال ( ريد بول ) والي اوجد فكره ال ( الفيسبوك )... وفي اختراعات ثانيه وبسيطه ومش مكلفه وتافهه حققت ثروات خياليه بالمليارات ولشخص ومش لدول كمان.

اشي بقهر .. مش عارفين ننتج ولك يا عمي علبة ( بف باف ) لقتل الصراصير .. كل اشي بنعتمد فيه على الغير .. دايما بنوخذ الاشي جاهز من الغير .. بدناش انتعب حالنا .. ما عنا امل واحد بالميه بحالنا .
بنوخذ كل اشي من برا .. الادويه .. الصناعات .. الماكولات والمشروبات .. حتى (الافكار ) بنوخذها من برا .. مش مكلفين خاطرنا حتى انفكر .. وبرضو بنوخذ حلول مشاكلنا من برا ..
تعالو معي انشوف وين المشكله ...

جزء من المشكله انو احنا فاقدين الامل باشي اسمو ( البحث العلمي ) هذا اولا ... انو حضرتنا ننفق اشويه مصاري على البحث العلمي مستحيل .. ليش .. لانو حضراتنا وانا اولكم فاقد الامل بالبحث العلمي لانو بحاجه الى مصاري كثير وعلى سنوات طويله تصرف فيه على العلماء والباحثين من اجل الخروج باكتشافات تفيد البشريه وتحقق ثروه ... والعرب ما عندهم صبر ولا عندهم الامكانيات الماديه وكمان ما عندهم اصلا اشي يبحثو فيه .. لانو الاجانب سبقونا بكل اشي ..
بمعنى .. اذا اردت ان تبحث في اكتشاف دوا للسرطان .. سلامتك واتعيش .. الاجانب سبقونا بهاي الخطوه مليون سنه .. يعني حضرتك لو بدك اتبلش بهذا الموضوع على الفاضي ... لانو شو ما طلع معك .. الاجانب طلع معهم هذا الاشي من زمان وانتقلوا لمراحل متقدمه في بحوثهم .. يعني ما راح نقدر انلحقهم او نجاريهم او انزيد عليه .. سبقونا يا عمي .. اتاخرنا كثير ... ومش بس بالطب .. بكل اشي ..

تعال جاي خلينا نحكي .. بشو بدك تبحث ؟ .. بالسيارات .. سبقونا .. بالطيارات ... سبقونا .. بالصناعات .. سبقونا .. بالموديلات والبكيني .. سبقونا .. بالسلاح .. سبقونا ... بالافكار .. سبقونا ... بالتخويث .. سبقونا .. بالمنجقه .. برضو سبقونا ... بالجينات الوراثيه ... سبقونا .. بوصولهم للاقمار والكواكب .. سلامتك واتعيش .. سبقونا واستوطنوها كمان .. بكل الاختراعات والاكتشافات .. برضو سبقونا ... ما ظل اشي عندهم الا واشتغلوا عليه من زمان زمان ... شو بدنا انبلش من هسه .... بظبطش .. الشغله الوحيده الي فالحين فيها هو انو نعمل الشغله الجاهزه على نكهات .. معروفه .. على نكهة ( الفراوله .. التفاح .. الموز .. الشوكلاته ) حتى المية بندوره بنفش غلنا فيها وبنروح بنعملها على نكهات .. وبنفكر حالنا اخترعنا اشي يعني.. انا عارف.

اي اشي بتفكر اتبلش فيه عشان تبحث فيه باي علوم .. سلامتك واتعيش ... اقتحمو مضماره وانتهو منو واحنا لسا صراخنا بعلو بالمباريات .. والله بسمعكم لما امر من جنب بيوتكم .. جوووووووووول ... اقعد يا ولد ... ( مسي ) جاب جووووووول ... روح يا ولد جيب كنافه ... اي حتى الكنافه صارت تيجينا من الصين جاهزه ... بشو احنا فالحين ؟ ... ولا باشي .. اي حتى حروبنا مش عارفين انحارب .. السلاح من برا .. والافكار من برا ... واطحن يلي ما بتطحن .. نازلين ذبح ببعضنا .. وكأنا خلقنا بهاي الارض بس عشان انقتل بعض .. مش عارف .. رمينا العلم واستخدام العقل والتفكير من ورا ظهرنا ... جوووووووول .... شفت .. شفت .. ضربت بالعارضه .

شايفين يا جماعه .. صرلي ساعه بحكي .. والاخ المحترم عقلو بالمباراه .. كأني بحكي مع الحيط .... يعني احنا خلصنا كل اشي وظل بس انرفه عن حالنا بحضور مباراه ولا مسلسل ولا سماع اغنيه .. احنا بلشنا السلم بالعكس ... بنرفه على حالنا وبنضيع وقتنا بالاول وبعدين يلا السلامه بدنا انروح انفكر ونخترع .. الاجانب عكسنا .. بس خلصو وختمو العلم انطلقوا للترفيه عن انفسهم وعن مجتماعاتهم ... ولساتهم على تواصل مع العلم على فكره .. محققين توازن بكل اشي .. يا سلام عليهم يا سلام .
في ملاحظه .. هسه احنا العرب طفره هيك بطلع عنا واحد بفهم .. يا حرام بيأس من العرب لانو ما بجد فرصه ينطلق منها وخاصه انو زلمه ذكي وعندو قدرات يخترع او يعمل اشي .. اخبط .. بتسمع عنو انو هاجر او سافر على دول الاجانب .. بقدرو هذا الانسان الفهمان وبعتنو فيه وبحطو بمؤسسه علميه وبظرف سنه بزيد على علمهم وبستفيدو منو وبستفيد منهم .... وقال الناس بلوموا لهالعالم هاذ .. ترك العرب وطفش على دول الاجانب .. هذا عميل .. هذا باع العرب .. هذول الاجانب بخلوش عالم عربي عند العرب عشان ما يستفيدو منو .. لا يا حبيبي .. هو الي راح لعندهم وقدم طلب شغل عندهم وشرحلهم افكارو ونظرياتو وقلهم العرب مش فاهمين علي ولا ميعطيني فرصه وما في عندهم اهتمام بابحاثي ..منشان الله اقبلوني عندكم واعطوني فرصه.. فاعطوا فرصه .. هذا الي قاعد بصير ..ولا الاجانب ولا هو على بالهم ..وهو هيك يا حبيبي بكون معذور .. هو لو لاقى اهتمام او لاقى مؤسسات علميه عربيه تحتضنو ما راح لعند الاجانب .. الاجانب بتستفيد من علمو واحنا ولا معنا خبر .. مليون والف مليون شهادة دكتوراه وماجستيرعربيه وفيها من الافكار والدراسات والمشاريع والاختراعات التي ممكن ان تنقل العرب من الصفر الى درجه المائه بس لو تستغل .. بس لو في مؤسسه ( بحث علمي ) جاده تستقطب هؤلاء وتدرس افكارهم ورسائلهم وتعطيهم فرصه يطبقوا عملي ويجربو ويكتشفوا راح يطلع منهم اشي عظيم واعظم مما توصلوا اليه الاجانب .. بس هيهات .. يا زلمه لهسه ما سمعنا واحد اخترع ولا عمل ( جهاز خلوي عربي ) يا زلمه .. يا زلمه راح انجلط انا ... يا زلمه جيب القطع من برا وجمعهم هون وقول انك انت اخترعتو يا زلمه .. بس يعني قدام العالم هيك شغله معنويه بس.. واعطيه اسم عربي ( خلعر ) يا زلمه ..اول حرفين من ( خلوي عربي ) .. شو هاذ ؟.

حضرتي بلشان بالناس وناسي حالي ... ما اقوم انا حضرتي بدل ما انا قاعد انظر عليكم اقوم اخترعلي شغله او اعمل اشي مفيد .. والله يا عمي مش قادر .. مثي مثل العرب .. على ( مسطل .. والله دايخ .. قرفان ... انسى يا زلمه .. بعدين .. انشوف الحجه شو طابخه هسه .. رن علي المسا .. هتلك سيجاره ) .. اذا الحجه لليوم بتقولك قوم شد حبل هالغسيل يما .. وحضرتك ( نايط ) صرلك ثلاث سنوات على بكره .. كمان اشوي .. وصرلها الحجه ثلاث سنوات وهي بتنشر الغسيل على الدرابزين .. ليش .. لانك نايط .. هذا بدو يخترع ( ريد بول ) .. اي ميله اتميلك .

ملاحظه .. مع احترامي للامه العربيه كافه ولكل العرب .. ولا اقصد الكل .. وانما بعض من عرب جيل اليوم ( النايط ) الي الامه العربيه عاقده الامل عليهم .. قال امل قال .. كلك حركات مع امل .. قصدي مع ريد بول.
برهان جازيه
burhan_jazi@yahoo.com