|
|
|
السبت , 23 تشرين الثاني/نوفمبر 2024
بسطات انتخابية
بقلم : فيصل البقور 26-12-2012 10:38 AM لا تقول لي انك ما بتنام الليل لأنك تشعر بالقلق على الوطن والمواطن !! لا تقول لي انك ستدعم قطاع الشباب لأن اللي شافوه الشباب مع الربيع المستورد جعلهم ما يصدقوا شي الا اللي يحطوه بجيوبهم !! لا تقول لي انك ستحمل هموم المرأة كونها نصف المجتمع , لأن المرأة هي اللي علّمتك وربّتك وشاركتك كل حياتك , وهي اعّرف الناس بكل افكارك ,!!! وكمان لا تقول لي انك سوف تحل مشكلة البطالة في اقل من كذا , لأني ما رح اصدقك ,!!! لا تقول لي انك نائب وطن , لأن الناس عرفوك فقط نائب عن بيتك !!! اما اذا بلشت تحكي عن الاقتصاد وانك حلاّل المشاكل وانك قدّها ومن اهلها .... لا يا سيدي انت سبب مشكلتنا اصلا فكيف رح تحل ؟؟؟ الاولى انك تحل حالك وتحل عنا ... . ورح تمر في شعاراتك على القوانين , اللي يجب تعديلها , ضمان اجتماعي للكل!! , تعليم مجاني للكل !! رواتب للي مش عايشين !! ماء وكهرباء وغاز للكل !! حنفية , وابريز , وجلدة غاز لكل مواطن وشطب المديونية !! وما رح تنسى تمر على القضية الفلسطينية وانك هاي المرة ناوي تحلها عن جد مش مثل قبل .!! المهم انّا مع اي مرشح هالسنة رح نسمع النشيد الانتخابي نفسه , اما اللي ما سمع يقدر يحط بعد العصر على جواله رنة ( دندنه على عود الديمقراطية ) لفرقة 17 . المشكلة هي وجود البسطات الانتخابية على مساحة الوطن , واي واحد يوقف عند اي بسطة رح يطلع بعشرات الشعارات الرنانة , مشان اي حملة انتخابية سواء كنائب , او رئيس بلدية , او اي منصب يحتاج الوصول له شعارات تدغدغ الناس او تحك ( على جرب ) . ومع وجود مستنبتات الفساد , اكيد رح تدعي انك الفيروس القادر على اجتثاث الفساد والمفسدين , معلش لا تزاود علينا , لأن ملفات الفساد طلعت من تحت ايدك , والمفسدين على ايدك طلعوا براءة , بعد ما اكلوا وشربوا خير البلد وانت واقف على نفس المائدة , طبعا اكلت زيهم او اقل شوي , ويبدو انك ما شبعت وناوي تشبع عند اول فرصة جاية , بعد ما تتشعبط على ظهور مساخيط الوطن , وهنا اقدم اقتراحي للمرشحين كلهم اللي ناويين على النجاح مش بس للمشاركة مثل المنتخب الوطني , اقتراح انهم يلموا حالهم وعلى اول طائرة للملكية الاردنية , ويروحوا يشوفوا الشعارات الجديدة في معامل الديمقراطية , ويشتري كل واحد منهم شعاراته اللي لسه ما حدا لبسها ( عفوا استعملها ) ويفكونا من شعارات) الستوك) ’ اللي يجيبوها دايما من شارع الطلياني ( مستعملة ومهترية) وما بتكمل جلسة واحدة تحت القبة الا ويظهر خرابها . وهيك تقدر تقنعني بأنك ناوي على التغيير اما انك تضل تعيد شعاراتك وكلامك من 20 سنة ولسه ما غيرت شي ( لا بأقوالك ولا بأفعالك ) , بعدين يكفي خلو شارع البالة لغيركوا وخليكوا على الجديد والغالي لأن الغالي ثمنه فيه . لأن هالمرة انت المطالب بالتغيير مش انا والا ما رح اصوت لك ولا لغيرك .....
التعليقات
1) تعليق بواسطة :
26-12-2012 11:54 AM
 هذه والله هي الكموديا السوداء , إن الشر البلية ما يضحك !! بضاعتهم قديمة عفا عليها الزمن , والله لو طاف قادة الشعارات الدجل والنفاق ارجاء الكرة الأرضية سيعودوا بخفي حنين , فهم يا سيدي من يصدر للعالم الفساد والمفسدين , فهم يحملون اعلى الشهادات في النهب والسلب , فلديهم طرقهم المبتكرة في التهرب من المسؤولية , ويغطون انفسهم بطرق جهنمية للهروب من القانون , هم اكاديميات ومراكز ابحاث في الأبتكار الذي يسهل عليهم متابعة مسيرة الشعوذة والسرقة .
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق