أضغاث احلام

السبت , 23 تشرين الثاني/نوفمبر 2024

أضغاث احلام

بقلم : م أمجد الشباطات
05-11-2013 11:31 AM

يوم أمس حلمت حلماً(خير اللهم إجعله خير) أنني جالس في
قاعة تضم رئيس الوزراء ومجموعة صحفيين لإلقاء بيان صحفي وشاهدت في الحلم رئيس الوزراء يتوجه لمنصة الخطاب ويستوقفه أحد المساعدين حاملاً الجوال ويخبره بوجود إتصال مهم من البنك الدولي.
رئيس الوزراء: يا هلا يا مرحبا....نعم ....نعم....... زي ما بتعرفوا نفذت كل اللي طلبتوه وزيادة.....اه...نعم.......لا لا لا ولا يهمكوا ما راح يسير شيء.. الحمد والشكر لله الشعب الأردني متفهم وراعي نخوة وأهل فزعات راح يتحملوا كل القرارات ....يا عزيزي في النهاية هاي بلدهم وهم يعني لمين بضحوا؟؟ كله مشان بلدهم.....اه ...نعم بلدهم وما بحرث البلاد غير عجولها شو يعني نجيب من وين.....
نعم نعم إحنا جاهزين للمرحلة الثانية من وقف الدعم..أهم شيء رضاكوا. وأنهى دولته المكالمة وذهب أطال الله عمره إلى المنصة ليلقي كلمة ومن ثم يتلقى أسئلة الصحفيين.
رئيس الوزراء: أنا عمري 74 وما بحب الكذب 80 % من الشعب ما راح يتأثروا ولا يشحدوا الملح ولا يبيعوا إللي فوقهم وتحتهم .... الشعب الأردني كان مظلوم وبقولوا عليه كشر وما بضحك ولا بعرف ينكت, شوفوا كيف بعهدي حجم النكت والتعليقات على وسائل التواصل الإجتماعي....يا الله شو أنا سعيد وفخور بهذا الإنجاز......يا عمي الشعب الأردني بده اللي يفهمه ويريحه ويطلع مكنوناته ويضغطه...أيوه يضغطه..كل الحكومات السابقة ورؤساء الوزراء مع إحترامي إلهم ما كانوا قريبين من الشعب ولا حاسين فيه ولا عارفين قدرات شعبنا...الشعب الأردني قابل للضغط...والصهر....الشعب الاردني مثل الذهب الخام بده صهر وشوفوا شو بطلع منه....خفة دم ونكت ..وكمان تضحيات...حتى إنهم بعطوني أفكار للرفع ما بتخطر ع بالي. وكمان والله يا جماعة صدقوني بتقاتلوا لدعم الميزانية ودليل هالحكي انه لما بنرفع شيء بزداد الطلب عليها,,,شو معناته هالحكي؟؟ شعب يا عمي بده يدعم حكومته وميزانيتها.
(وقت الاسئلة)
صحفي1: دولة الرئيس شو بتقول عن الحراك في الشارع ورفضهم سياسات الحكومة ومطالبتهم بالاصلاح ورفع سقف الحريات
- رئيس الوزراء: شوف يا اخي الكريم أنا عمري 74 سنة وما بكذب سؤالك عن الحراك اللي في الشوارع ومطالبتهم برفع سقف الحرية والإصلاح فيه الاجابة وبجواب عن نفسه.
-صحفي 1: كيف دولتك؟
رئيس الوزراء:يا أخي لو ما في إصلاح ورفع لسقف الحرية كان ما شفت ناس في الشوارع بطالبوا وبهتفوا وهذا دليل على الإصلاح والحرية للشعب يحكوا ويقولوا اللي بدهم(وإحنا بنعمل اللي بدنا)
-صحفي2: لكن فيه دولتك إعتقالات لبعض الحراكيين هل هذا دليل أن صدركم لم يتسع للتعبير عن الرأي؟ رئيس الوزراء:بالعكس يا أخي أنا صدري واسع ونفسي طويل جدا, نحن نتفاعل معهم وبنحترم رأيهم القضية ببساطة هي عملية تنخيل تتم في الخفاء والعلن..... إحنا بنشوف مطالب الحراكيين القابلين للتليين وبنزبطهم...اللي بده بعثة خارجية بنبعثه...اللي بده وظيفة بنلزقه فيها اللي بده منصب بنعطيه حتى ممكن يوصل وزير وبتعرفوا إنه أخر تعديل حطينا وزراء كانوا بشتغلوا معارضين, أما اللي تم اعتقالهم للاسف هؤلاء أعداء للوطن ولأنفسهم يا أخي دماغهم ناشف وما بدهم يتفاهموا...شو نعمل معهم أكثر من هيك؟؟
- صحفي3:دولتك حج مبرور وحمدا لله ع السلامة ممكن تحكيلنا إنطباعك عن الزيارة للمملكة العربية السعودية وأكثر الاشياء اللي جذبت انتباهك؟
- رئيس الوزراء: الله يسلمك, والله شغلات كثيرة جذبتني ولفتت انتباهي مثل الطواف المرفوع حول الكعبة اللي خفف من الازدحام وطريقة رفع استار الكعبة,مممم ....رفع الاذان داخل الحرم بالصوت الجميل اللي يلامس شغاف القلب... وبيني وبينكوا تنبهت لشغلات كثيرة كانت غايبة عن ذهني لكن إن شاء الله راح أستدركها في أول إجتماع لمجلس الوزراء.
صحفية 3: دولة الرئيس هناك الكثير من الدعم المالي من الدول الشقيقة والصديقة للاردن لماذا لا يظهر الاثر لهذه المساعدات على الشعب الاردني واين تذهب هذه المساعدات؟
رئيس الوزراء: يا أختي الكريمة فيه نظرية مشهورة إسمها (allowable waste) يعني الهدر والضياع المسموح فيه ,مثلا فيه هدر مسموح فيه بشبكة المياة زي ما بعرفواجماعة وزارة المياة حتى انه بوصل مرات لغاية 90% في بعض المناطق ونفس الشيء في الكهرباء لذلك فيه هدر طبيعي والحمد لله ونفخر إنه الهدر عندنا ضمن المعدلات الطبيعية لدولة مثل الاردن حسب التصنيف العالمي لدرجة الفساد ووضعنا أفضل من دول مجاورة وانا بضمن الكوا انه هالهدر لا يتجاوز 60 %
صحفيه3: وهالهدر دولتك وين بروح؟
رئيس الوزراء: يرفع كتفيه ويتبسم وينظر للسماء وسمعته يقول: لقد آن أوان الرحيل.... الرحيل.
وأستيقظت حينها وتمنيت أن أستكمل هذا اللقاء....